Poetas populares de Sendin (2)
Las abinturas que eiqui se cúntan teneran-se passado ende puls anhos 30 de l seclo XX. Cumo se puode ber, la ida a la fiesta de l Naso era ua abintura mi grande, subretodo para un garotico que se bota a pie, cun gana de ber l mundo, çcalço, sien merenda i sien denheiro. Son aqueilhas situaçones an que las codiicas de pan sáben a almendras. La curjidade era tan grande, talbeç debido a la fama que tenie la fiesta de l Naso, que balie la pena nien que apuis lebara ua túndia de l pai.
Abinturas de Manuel Ralin
Quando youn era pequenino
Cumigo passou-se un caso:
Çcalço, cula fralda fuora,
You fui a tener al Naso.
You merenda nun lebaba,
Nin denheiro para comer,
Tenie ua codiica no bolso,
Cumo era l modo de la rober!
You quando era pequenino
Mi mai quedou a amassar
Por nun saber onde you staba
passou todo l die a chorar.
Éran foguetes no aire
I la música de Chacin.
You dezie acá para mi:
- An chegando a casa
bai-me a matar tiu Ralin.
Outor: Manuel Ralin
Bersos ditos por Manuel Bárbelo, 85 anhos
Recuolha de Amadeu Ferreira an 5/08/2003
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
