POETAS DE L DOURO
9. Manuel Arandilla
Manuel Arandilla Navajo naciu an Aranda de Duero, an 1950. Apuis de andar pul mundo a studar, tornou a la sue tierra, cuntinando siempre a bibir acerca de l Douro.
Gusta-me este poema, que fala de un riu de palabra nua altura na que muitas pessonas nun la ténen. Tanta malbadeç le ténen feito i inda mais le quieren fazer que nun admira se, a las bezes, fala el solo cumo un boubo, a gargalhones.
Tal cumo a Manuel Arrandilla tamien l Douro me rapinha la mimória, mas you nun m’amporto. Só que l miu Douro nun ye manso i sereno cumo l de Aranda de Duero, mas parece siempre anrabiado, nun le deixando fazer cuçquinhas als parros nas sues costielhas i la sola selombra que lo çfria ye de las faias quando l sol nace i se çpon.
Un riu de palabra
L Douro ye un riu de palabra.
Lhembra-se-me inda sue prosa azul,
sue roncha de dius lantre las augas.
Sues bordas árden de suidade,
mas, a las bezes, fala el solo
cumo un boubo,
a gargalhones.
Cuorre, passa, abaixa,
curceficando-me
cun un sentido,
cun tanta selombra.
Lhembra las cuçquinhas de l parro
an sues costielhas,
l uolmo abraçado a sue cintura;
l aliseiro cun sou aire de puntífece
pul meio la nubrina de l’alba.
Rapinha-le la mimória.
Abaixo cun el i acubre-me la sue palabra.
Traduzido por Amadeu Ferreira
an 23 de Abril de 2006
Hoije, die 27 de Maio, an que scribo eiqui este poema, José Almendra deixou-me un librico chamado «Tiempo de Vendimia», todo cun poemas de Manuel Arandilla i retratos de Florentino Lara. Ten alhá un guapo poema de Manuel Arandilla, que tamien eiqui bos deixo, cun un Dius te l pague a Jesé Almendra por me lo haber dado a coincer. Nun rejisti, yá que nada quadra melhor do que Douro i bendímia.
Douro de Castielha: barco cun proua de mar
até al mar (fin que nun s’acaba nunca)
estas manos
nuossas
péinan las óndias de tou pedamiego afinconado
i resfolgamos
l doce i cálido bolo de l outonho:
luç nas alas de la bida
ye tiempo de bendímia.
Amadeu Ferreira
27 de Maio de 2006
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
