POETAS DE L DOURO
5. José-Miguel Ullán
Naciu an Villarino de los Aires an 1944, tierra que se puode ber bien de ciertas partes de l Praino Mirandés, mesmo delantre de Bempuosta. Ye tierra que se fizo an barraiges (Salto de Villarino I i II): dun lado bei l Tormes i lougo apuis l Douro, que s‘ajúntan fazendo un solo ne l sítio que le cháman Ambasaugas; mesmo alantre bei Pertual, subretodo chubindo al Teso de San Cristóbal ou a la Peinha de l Pendon, un cantabouço que la fuorça dun home puode bulhir. Fui eiqui que ls de Villarino daprendírun a mexer la grandura de l mundo, que até ténen ua canal de Telbison solo para eilhes. Fui por estes hourizontes que ha de haber andado José-Miguel Ullan. Apuis fui-se por outros mundos, mas nunca ye ambalde que se nace i crece por estas ladeiras sorbidas pul Douro. Fui-se cul aire, mas quedou, cumo diç an un de ls sous poemas: «Lo inesperado es vínculo del viento ... Insistir, cabecear, reír. O, al airear lo nuestro, urdir fraternidades entre esto y lo otro, entre enigma y las campanas, aunque con la oscilante monotonía del ulular que acalla una inconclusa deserción armoniosa. La de no acabar de saber del todo decirle al viento: – Anda, llévame contigo...»
Dous bersos solicos, que l restro ye correr, cumo lo andícan las retocéncias, parecendo cuntradezir l títalo, «coda» que mais parece un ampeço do que ua fin. Mas la «coda» tamien mos faç oubir músicas que nunca páran, nien de nuite nien de die. Ls dous rius, Douro i Tormes, stan armanados de tal maneira que un sonha i l outro rializa esses suonhos. Die i nuite, sonhar i correr, assi resume l poeta toda la eipopeia de ls dous rius i de las gientes que los béien correr. Diç el, noutro poema, que «Esclavos somos de raíz», cumbidando-mos, cumo quien oube l Douro i bei sues arribas, «Oye tan sólo la armonía neutra de lo indeciso e indomable». Assi, las palabras acában mesmo por faltar: todo se spessa an sabor, cumo l miel.
Coda
L que l Douro de die sonhaba
pula nuite de l Tormes corrie...
Traduçon de Amadeu Ferreira
l die 24 de Abril de 2006
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
