POETAS DE L DOURO
Yá muitos anhos que me perdo a çcubrir poetas de l Douro. I siempre torno a eilhes, cada beç mais. Ye un modo de sentir l riu que, mesmo loinge, me cuorre andrento.
Eiqui queda un manhuço de ls poemas que ambencelhei, a modo antologie, al perpósito para este sítio. Ye ua houmenaige a ua giente que nunca tubo miedo de arribas ou de faias i, inda an ayunas, lababa ls uolhos ne l riu. Muita beç nien chegaba a saber se era l riu que corrie, se éran esses uolhos que l manában.
An mirandés, que ye la léngua que fala l Douro que m’arrolhou.
1. Miguel de Unamuno
Miguel de Unamuno (Bilbau, 1864 – Salamanca, 1936) amou l Douro i Pertual, sendo eiberista cumbencido. Screbiu algues de las mais sentidas páiginas subre las arribas de l Douro, que corriu todas por sou pie, assomando-se a las faias de Fermeseilhe i de to las tierras riu abaixo.
L poema que eiqui deixo, «Durium, Duero, Douro», fui screbido an 21 de Abril de 1930, bai a fazer 76 anhos, quando Unamuno s’achegaba al fin de sue bida. Staba nesta altura çterrado an França, por ser contra la ditadura de Primo de Rivera. La biaije que faç pul Douro, yá nun ten quelores de primabera, cumo habie de ser nun poema screbido an Abril, mas amostra ua peisaige anterior feita de quemunhon cul mais andrento de la natureza, arrepassada de tiempo, de stória i de cultura, arrochada an palabras tan peinadas que parece que arrebéntan. Al falar dua cierta peisaige dezie: «Y hai paisajes que conviene mirarlos a menudo en ayunas y aun con algo de sed (...) hubo momentos en que creí que se me iba a parar el corazón o a estallárseme o a cuajárseme la sangre... El campo es una metáfora.» Ye l mesmo sentimiento l que sal deste poema.
Durium, Duero, Douro
Arlança, Carrion, Pisuerga,
Tormes, Águeda, miu Douro.
Castiços, andebles, íntemos,
spelhando los claros cielos,
regando los pardos campos,
i rezando remanseiros.
Balhadolide; arródias-la,
de nubrina le dás beisos;
arrolhabas-le a Felipe
cuontas de los quemuneiros.
Tordesilhas; de la boca
d’amor bás pilmando l duolo
a que selombra piadosa
dan ls amores de Don Pedro.
Toro, albante an atalaia,
de sues leis yá nada lembro,
faç cun las tues augas bino
al sol de Lion, borralho.
Çamora de Dona Ourraca,
Çamora de l Cid moço,
sónhan torres cun sous uolhos
seclos an corriente speilho.
Arribas de Fermeseilhe,
por piquetes de barrucos,
tembrando l Tormes ancosta
an tou suolo l sou sonhar.
Code de Mieza, que colga
porriba ls poços de la cama.
La scumbreira de Laverde,
donde se scumbrórun rezas.
Frejeneda frunteiriça,
culas sues binhas por freznos,
Barca d’Alba de l abraço
d’Águeda an tou zaugadeiro.
Douro, que bordando binhas
bás até l mar prijoneiro,
cuolhes de camino l Támega,
asnal de fondas suidades.
An sue Foç l Porto sonha
cun Urbion altaneiro;
Sória an sue alta meseta,
cul mar toda un carreiron.
Arble de fuortes raízes
agarrada al pátrio suolo,
bében tues fuolhas, las augas,
l’eiternidade d’ampeinho.
Traduçon de Amadeu Ferreira
an 18 de Abril de 2006
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
