Poetas Populares de Sendin (1)
Apersento aqui uns bersos, yá publicados ne l Jornal Nordeste an 2003, arrecolhidos an Sendin i que yá fúrun feitos por esses anhos 20 de l seclo XX. Fúrun ambersados por tiu Juan Catrino, un home que to la bida trabalhou ne l campo i que gustaba de ambersar. Tiu Juan Catrino yá se morriu hai muitos anhos, mas muita giente inda se lembra bien del. Eiqui queda un teçtemunho de la sue bida de garotico i de moço, que ye tamien ua houmenaige. Esso solo fui possible porque houbo ua cabeça cun ua mimória strourdinária que los grabou, tiu Manuel Bárbelo, un home que ten muito, muito que cuntar, i ye un sendinés que yá corriu mundo. Dixo-me que, un die, tenerie el ls sous treze anhos, benie pul camino de Malhada culas bacas i que le oubiu dezir ls bersos, ua sola beç, a tiu Demingos Nobre, de la mesma eidade, i lougo los grabou. Tiu Manuel Bárbelo ten hoije 85 anhos, i que Dius le deia muitos mais cun salude. Tiu Demingos Nobre, l maior artista bibo de la madeira de to la Tierra de Miranda i de mais lados, talbeç inda se lembre de ls bersos i até puodan ser algo defrentes, que cada cabeça guarda las cousas a la sue maneira.
Cumo tiu Juan Catrino, muitos outros poetas populares ten habido, i inda hai i cuntinará a haber, an Sendin i pulas tierras de Miranda. Poetas que ambérsan na sue léngua, la léngua mirandesa. Ls bersos que fázen pérden-se l mais de las bezes porque nun hai quien los scriba. Puoda ser que quien los leia conheça outros i tenga la buona eideia de mos los dar a coincer, prestando assi ua houmenaige sentida als que los fazírun ou que los guardórun. Lede i fartai-bos de rir cumo you me fartei
Amadeu Ferreira
Las zgrácias de Juan Catrino
You quando era pequenino,
Dieç anhos tenerie,
A mi nunca me quijo squecer
L que me passou un die.
Miu pai mandou-me
Culas bacas pa l prado
I you anjoldei-me cun rapaç,
Deixei l portielho mal tapado.
You bin para casa, a la tarde,
Sin saber mais nada de las bacas,
Mas, a la çpuosta de l sol,
Lebei ua de las tales casacas.
Dezie mie mai para miu pai:
- Mira que tu matas l filho!
Mas el q’arrespundiu?
Que las bacas tenien comido l milho.
Tornou-le a dezir mie mai:
- Olha que matas l rapaç!
Mas el q’arrespundiu?
Pus ye para ber s’outra nun faç.
Porradas i mais porradas
An riba de l miu cuorpo.
Quando me el me deixou
You yá staba cumo muorto.
Alhi ua temporada,
You siempre l trouxe no sentido,
Passado un pouco de tiempo
Yá todo se m’habie squecido.
Apuis deixaba las bacas,
An muitas de las oucasiones
You iba par’aqueilhas tierras
Só a roubar mulones.
You roubaba mulones,
Roubaba fusse el a quien,
Passado un pouco de tiempo,
Caros mulones me salien.
Anton, a la mie selombra
Quantos era que roubában?
Mas só Juan
Todos mulones pagaba.
Agora yá só m’andicában
Las rapazas namorar,
Mas la rapaza que you namoraba,
Eilha era branca i bela,
Mas onde eilha drumie
Habie ua alta jinela.
Benie you un die par’ir par’eilha,
Mil sfuorços ampreguei,
Atrás dua parede
Ls mius çapatos guardei.
Mas you quando m’abeixei,
Abeixei tod’aflito,
Fui a agarrar ls çapatos
Yá solo ancuntrei l sítio.
You fui para casa çcalço,
Sin saber l que habie de pensar.
You dezie acá para mi:
- Agora miu pai si me bai a ir a matar!
Mas l que you habie de pensar
Para miu pai anludir?
“Tarda-se, daqui a la Spanha,
Quatro horas an ir i benir”.
Fumus, anton, a la Spanha
You i Manuel de Matos,
I, al passarmos l riu,
Caírun-se-mos ls çapatos.
Stá claro que miu pai
De la chalaça nun gustou,
Mas se l dixe tan bien,
Q’an todo s’acraditou.
You siempre fui un ladron,
Fui un ladron treidor,
Passado un pouco de tiempo
Acunteciu-me outra pior.
An cas de la mesma rapaza,
Cumo diç l dialeto,
Tube que salir a correr,
Deixei la jiqueta i l jaleco.
Outor: Juan Catrino (Sendin)
Bersos ditos por Manuel Bárbelo, 83 anhos, Sendin, que los oubiu ua beç, tenerie por ende uns 13 anhos. quando benie culas bacas ne l camino de la Malhada a tiu Demingos Nobre.
Recuolha de Amadeu Ferreira an 5/08/2003
Abiso:
Este testo, cunsante las regras de la Cumbençon Ourtográfica de la Léngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
