POETAS DE L DOURO
3. Antonio Machado
Naciu an Sebilha an 1875. Stubo alguns anhos de porsor an Sória, acerca de Urbion adonde nace l Douro:
«...you tube pátria adonde cuorre l Douro
antre cinzentas peinhas
i pantasmas de bielhos arzinales...».
Zdende, siempre l coraçon se le bolbie pa la fuonte de l Douro, «l Douro nino», fura qual fura la tierra adonde stubira. Por esso l riu fala an muitos de ls sous poemas, siempre a correr por ua peiseige sien un germo, de piedras, dura, seca i, mais que todo, triste. Triste cumo la tarde an que se quedou, un die 22 de Febreiro de 1939, cula Spanha ansangrada pula Guerra Cebil, a chegar a sue fin. Morrie-se cula República a que le dira l’alma, a la borda de l mar, an «estes dies azules i este sol de l’anfáncia». Cumo l mais de la poesie de Antonio Machado, tamien este que scolhi ye un poema arrepassado de tristeza, bien al son de la «tierra zamparada adonde cuorre l Douro».
La fuonte de l Douro
An Córdoba, la serrana,
an Sebilha, marineira
i labradeira, que ten
fincada, até al mar, la ala;
i ne l ancho praino
por donde la arena suorbe
la baba de l mar azedo,
até la fuonte de l Douro
miu coraçon – Sória pura! –
se bolbie... Á, raiana
antre la tierra i la luna!
Alta tierra zamparada
donde cuorre l Douro nino,
tierra adonde stá sue tierra!
Traduzido l die 22 de Abril de 2006
Amadeu Ferreira
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
