POETAS DE L DOURO
6. Francisco Pino
Ye un poeta de Balhadolid (1910-2002). Solo ampeçou a ser coincido yá alhá pa l fin de sue bida, anque tenga fazido salir muito libro de poemas, an eidiçones mui pequeinhas. Todo bieno de se haber metido na sue tierra, acerca de Balhadolid, i na sue bida, subretodo apuis la derrota de la República, an 1939. Stá bien de ber que cun Franco las cousas nun le poderien correr mui al son.
L poeta fala dun outro Douro algo mais acerca de l manantial. La sue auga antrou para andrento de l poeta i, “cacho de tiempo”, “lhieba a la Stória” cun eilha, i cuorre biba “an percion”. Cumo l Riu tamien cuorre andrento de l tiempo de l poeta, el chama la sue auga “até al mais fondo de mi”. Ye este l segredo de botar l Riu a caminar adondequiera que stéiamos i, assi i todo, sentir l frescor que chube de l’auga i nunca deixa ambolcar las arribas.
Douro
Esta auga,
eisatamente esta auga, a que chamo Douro zde l miu coraçon,
cacho de tiempo,
de passaige,
siempre al sol que l alumbra,
por remissacos i remolinos,
ambaixo l hourizonte que la magnetiza,
antre xeixos i puontes,
al sol,
antre aliseiros i tri(gu)eiras,
a la Bundade, al Sol,
antre silenço i caminar.
Porque esta auga lieba a la Stória, naturalmente, a tener cula sue Catolecidade;
an peciçon, esta auga, biba, até al hourizonte,
esta auga que chamo até al mais fondo de mi i deilha:
Douro .
Traduçon de Amadeu Ferreira
an 20 de Abril de 2006
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
