POETAS DE L DOURO
15. Domingos Raposo
Domingos Raposo ye mirandés de Aldinuoba, tierra adonde cuorre l Douro. Bien coincido de todos pul sou trabalho na dibulgaçon i studo de l mirandés, l sou poema nun percisa de comentairos. Quando lo leio beio-me ne l castro de San Juan de las Arribas, arrecolhido cumo quien pisa tierra sagrada. Talbeç me sente nua piedra, cumo tanta beç lo haberá feito Eimílio Baleso, ende pul sec. II-III, i deixar que ls uolhos báian cul riu ou se pérdan para alhá de l hourizonte. Por ambaixo la teç de l tiempo, cuorre la mesma auga, siempre çfrente, an busca dun nuobo çtino que ye l mesmo de siempre, cumo ua eiterna mocidade: nun mos tocou l nacer de l riu, mas tamien la sue muorte stá para alhá de nós. Quedamos cumo el: passamos i nada mais.
Douro de mie alma
Ah! Douro de ls mius amores!
Guardian de las streilhas,
Quanto gusto de ti
I de ls tous ancantos!
Que buono ye
Ber las ailas a bolar,
Ls paixaricos a cantar,
Las faias a assomar...
Oubir, scuitar...
Ls cachones a fungar,
Niebros i carrascos a silbar.
Pastores sues fraitas a tocar
L’auga a caminar
Sien parar...
Pa l mar eimenso....
A chorar...
Ah! Douro de mie alma!
Tu tenes boç,
Sós fuonte de bida,
D’einergie i riqueza,
L Sangre de la tierra.
Cumo tu, nun hai eigual.
Sós lhuç de Miranda,
lhuç de Pertual!
