5. Reza para saber se ua pessona stá bruxa
Purmeiro pessina-se la giente. Acubre-se l fondo dun prato cun auga i apuis, cula mano, fai-se l sinal de la cruç an riba de l prato. Na fin de la reza bótan-se an riba de l’auga de l prato 3 pingas d’azeite dua candeia que steia a luzir. Bei-se se l azeite queda junto ó nó i fai-se la reza nuobe bezes. Se l azeite quedar juntico la pessona nun ten mal se se spalhar an remiles de goticas ye porque la pessona stá mui mala.
Antes de la reza ampeçar diç-se l nome de la pessona que se quier ber se ten l mal. Apuis dize-se:
Quebrante te (me) dórun,
Quebrante de (me) daran;
Dous te (me) l dórun,
Trés te (me) l tirórun:
L Senhor i la Senhora
I l Batista San Juan.
Se ye mal d’ambeija,
Se ye mal d’oulhado,
Se ye mal de bruxedo,
Se son malefícios de l diabro,
Que l azeite se spalhe
Senó que s’ajunte.
An honra i loubor
De la Birge Marie.
Cun un Padre Nuosso
I ua Abé Marie
Bariante para curar ua pessona de bruxedo
Se an beç de querer saber se ua pessona stá bruxa se se quier sanar essa pessona, an beç de “Que l azeite se spalhe / senó que s’ajunte”, diç-se:
An honra i loubor
De l Santíssemo Sacramento
Que todo l mal salga para fuora
I to l bien entre para drento.
Al acabar cada ua de las trés an que se faç la reza bota-se l’auga pa la rue i diç-se:
Bai-te auga que yá bolou
Que baia l mal para quien l botou.
Recuolhas de José Almendra (2006)
