Preguntou-me quien era Eimílio Baleso, de que falo ne l miu testo Poetas de l Douro / 15. Domingos Raposo. Las mies çculpas por me haber squecido, quedando eiqui la splicaçon, para quien antressar.
An San Juan de las Arribas (que ye un castro classeficado cumo menumiento nacional), acerca de Aldinuoba – Miranda de l Douro, antre muitas outras fui ancuntrada ua laja de cantarie de sepultura que ten ls seguintes dezires, an latin: AEMILIO BALAESO SIGNIFERO ALAE SABININAE COGNATIO DE CEN. La traduçon an mirandés ye la seguinte: A Eimílio Baleso, porta bandeira de la Ala Sabiniana (ancarregado) de ls recoincimientos de la centúria. Esta laja stá ne l Museu Abade de Baçal an Bergança, anque haba ua cópia an pie la capielha de San Juan de las Arribas. Fui publicada pula purmeira beç an 1898.
Anton, quedamos a saber que - talveç yá ne l seclo I, mas al menos ne l seclo II -, eilhi fui anterrado un home de nome Eimílio Baleso, que staba ancorporado na Ala Sabiniana de las lhegiones de l eisército romano, i que ende tenie la funçon de fazer l recoincimiento de l terreno i de sacar anformaçones subre ls einemigos. La Ala Sabiniana quedou subretodo coincida na spediçon que fui feita a la Bretanha ne l tiempo de l amperador romano Adriano (anhos 117-138), todo andicando que Eimílio Baleso le pertenciu antes desse tiempo. Dízen ls antendidos que las funciones de recoicimiento ne l eisército romano éran feitas por homes balientes, cun coraige i anteligentes, antre outras culidades, yá que tenien de se zanrascar eilhes solos, muita beç an terreno einemigo çcoincido, para sacar las anformaçones neçairas.
Pul sou nome, sabemos que Eimílio Baleso era un zoela yá romanizado. Hoije sabemos que la tribo de ls Zoelas pertencie al pobo Stur i acupaba ua buona parte de l çtrito de Bergança i de la region de Spanha alredror, habitando tamien la tierra de Miranda muito antes de acá chegáren ls romanos. Assi, an sentido stórico, podemos dezir que ls Zoelas son nuossos antrepassados, eilhes que éran un pobo ourganizado de pastores i fornecedores de ls mais finos linos a la cidade de Roma. Stando la sue sepultura an San Juan de las Arribas, ye possible que Eimílio Baleso tamien fusse desta nuossa region.
An resume ye esto l que se puode dezir subre Eimílio Baleso. L que you falo del a respeito de l poema, yá ye eimaginaçon mie. Para quien conhece San Juan de las Arribas, sabe que aquel ye un de ls mais ampressionantes assomadeiros pa l Douro mirandés. Ora you yá oubi a Domingos Raposo a dezir l poema publicado, mesmo nesse sítio a mirar l Douro. L que you fiç fui arrecular dous mil anhos i eimaginar Eimílio Baleso sentado ne l sou castro a mirar l Douro, talbeç yá bielho, i a cuntar las sues abinturas al serbício de l eisército romano, deixando ls uolhos ir cul riu, agora que yá nun podie muntar an sou cabalho i ir po ende. Nun custa muito a eimaginar que, para quien stá an San Juan de las Arribas, ye ampossible nun mirar l Douro. I a Eimílio Baleso, pulas frinchas de las deficuldades de la bida desses tiempos, habie de le saber bien aqueilha paç grandiosa an que riu i arribas se cásan na purfeiçon.
Quiero inda acrecentar que falei an Eimílio Baleso porque ye ua pessona que dou cumigo a eimaginar cumo haberá sido la sue bida naqueilhes tiempos. Por mi, cuido que ye ua pessona de que ls mirandeses debemos de tener proua, yá que ye un de l mais antigos (talbeç l mais antigo) antrepassados de que mos chegou l nome.
Por agora chega de splicaçon. Un die, se l tiempo i l’anspiiraçon ajudáren, talbeç scriba la bida ou algue façanha de Eimílio Baleso. Talbeç un poema. Talbeç nada.
5 de Júlio de 2006
Amadeu Ferreira
