POETAS DE L DOURO
7. Gerardo Diego
Naciu an Santander (1896-1986) i bibiu an cidades ligadas al Douro, cumo Sória, que le dou nome al libro d’adonde ye sacado este poema, i de sue «muralha zdentada» que el fala, assi cumo de sous «santos de piedra» cumo Santo San Saturio, padoneiro de Sória.. Pertenciu a la chamada giraçon de 27 junto cun outros Frederico garcia Llorca, Albertí. Tamien el cantou l «Douro nino» an sou andeble nacer na sierra de Urbion nun poema al cúmio desta sierra, 2252 metros arriba l nible de l mar. Este poema acaba assi: «Mas algo, Ourbion, nun drume an tou carambelo, / que antre ls culeiros de tue birge niebe / sin parar nace i chora l nino Douro». Lindo!
L poema que eiqui bos deixo ye un de ls mais coincidos de Gerardo Diego, siempre persente nas antologies de l poeta. L Douro lhieba an sues óndias «palabras de amor, palabras» que ls namorados alhá sémbran, pus solo eilhes inda páran a oubir la sue «eiterna poesia d’auga», yá que la cidade i las pessonas le buolben las cuostas.
Remanse de l Douro
Riu Douro, riu Douro,
naide a acumpanhar-te abaixa,
naide se pára a oubir
tue eiterna poesie d’auga.
Andefrente ou cobarda,
la cidade buolbe las cuostas.
Nun quier ber an tou speilho
sue muralha zdentada.
Tu, bielho Douro, dá-te la risa
pul meio tues barbas de prata,
molendo cun tous remanses
las cousicas mal amanhadas.
I antre ls santos de piedra
i ls aliseiros de magie
cuorres lebando an tues óndias
palabras de amor, palabras.
Quien pudira cumo tu,
al mesmo tiempo quieto i andar,
cantar siempre l mesmo berso,
mas siempre cun outra auga.
Riu Douro, riu Douro,
naide a star cuntigo abaixa,
yá naide quier oubir
tou eiterno poema squecido,
a nun ser ls namorados
que pregúntan por sues almas
i sémbran an tue scuma
palabras de amor, palabras.
Amadeu Ferreira
Traduzido na Maio de 2006
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
